19. okt. - Rjúpur, umhverfi, loftslag, kauphöll, Úkraína og mótmæli

Morgunútvarpið

Rjúpnaveiðitímabilið hefst á morgun og stendur í mánuð. Umhverfisstofnun gerir tillögu að fyrirkomulagi rjúpnaveiða hvers árs, sem umhverfisráðherra svo samþykkir, en að baki tillögunni liggur heilmikil vinna og rannsóknir. Við slógum á þráðinn norður til Akureyrar og heyrðum í Bjarna Jónassyni teymisstjóra í teymi lífríkis- og veiðistjórnunar og fræddumst um hvað liggur að baki ákvörðun hvers árs og hvernig fyrirkomulagið verður að þessu sinni. Umhverfið skiptir okkur öll máli og Páll Jakob Líndal doktor í umhverfissálfræði hefur verið óþreytandi í að breiða út þann boðskap og mikilvægi þess að umhverfisþættir séu teknir með í myndina þegar unnið er að skipulagi og uppbyggingu hvarvetna. Páll kom til okkar og ræddi þessi mál og sagði okkur m.a. hvernig þrívíddartækni getur nýst í umhverfissálfræðinni. Fjórða matsskýrsla vísindanefndar um loftslagsbreytingar var gefin út og kynnt í gær en skýrslan staðfestir, svo ekki verður um villst, að loftslagsbreytingar eru byrjaðar að breyta náttúrufari og lífsskilyrðum fólks hér á landi með vaxandi áskorunum fyrir efnahag, samfélag og náttúru. Við ræddum niðurstöðurnar við Halldór Björnsson, loftslagsfræðing og formann nefndarinnar. Magnús Harðarson, forstjóri Kauphallarinnar var gestur okkar og við ræddum stöðuna á íslenska markaðnum, skráningar fyrirtækja og aðkomu almennings sem hefur breyst nokkuð á undanförnum misserum. Tveir a.m.k. fórust þegar rússnesk eldflaug hæfði fjölbýlishús í úkraínsku borginni Zaporozhzhia í gærnótt. Karl Þormóðsson bjó þar ásamt fjölskyldu sinni þegar Rússar réðust inn í landið og þá heyrðum við í honum þar, en nú hefur hefur verið hér á landi undanfarið. Við ræddum við Karl um stöðuna í Zaporozhzhia og hvenær hann býst við að geta snúið aftur heim. Við ræddum mótmælamenningu hér á landi og í Evrópu, kannski sérstaklega Bretlandi, í lok þáttar við Eirík Bergmann, stjórnmálafræðing. Tónlist: Vök - Ég bíð þín. Sade - Smooth operator. Oasis - Live forever. Maneskin - Beggin. Bubbi - Holan. First Aid Kit - My silver lining. Bruce Springsteen - Dancing in the dark. Hipsumhaps - Góðir hlutir gerast hææægt.